ಗಜಲ್ | ಸಖಿ | ವೆಂಕಟೇಶ ಚಾಗಿ

 

ಗಜಲ್

ನಿನ್ನ ನೆನಪುಗಳ ಅರಮನೆಯಿಂದ ನಾನೆಂದೂ ಹೊರಬರಲಾರೆ ಸಖಿ

ನಿನ್ನ ಮಾತುಗಳ ಮಧುರ ಗುಂಗನ್ನು ನಾನೆಂದೂ ಕಳೆದುಕೊಳ್ಳಲಾರೆ ಸಖಿ

ಕಳೆದು ಹೋದ ದಿನಗಳು ದಿನದಿಂದ ದಿನಕ್ಕೆ ಮತ್ತಷ್ಟು ದೂರವಾಗಬಹುದು

ನಿನ್ನೊಂದಿಗೆ ಕಳೆದ ಕ್ಷಣಗಳ ಸವಿಯ ಮತ್ತೆಂದೂ ಕಾಣಲಾರೆ ಸಖಿ

ನಮ್ಮಿಬ್ಬರ ಪ್ರೀತಿಯ ಆ ಕಾಮನಬಿಲ್ಲು ಮುದಿತನವ ಮುಡಿದಿರಬಹುದು

ಮಡಿವಂತಿಕೆಯ ಸೋಗಿಗೆ ಹೆದರಿ ನಿನ್ನ ಪ್ರೀತಿಯನೆಂದು ಮರೆಯಲಾರೆ ಸಖಿ

ಗಹನವಾಗಿರುವ ಬದುಕಿನೊಳಗೆ ಕತ್ತಲೆಯ ಛಾಯೆ ಆವರಿಸಿರಬಹುದು

ನಿನ್ನ  ಕಣ್ಣ ಬೆಳಕಿನ ಕಾಂತಿಯ ನಾನೆಂದೂ ಹೊರಗೆ ಹರಿಸಲಾರೆ ಸಖಿ

ಮುದುಡುತಿರುವ ಈ ಕವಿಗೆ ನೀನೆಂದಿಗೂ ಸದಾ ಸೂರ್ಯರಶ್ಮಿಯಂತೆ

ನನ್ನ ಉಸಿರು ಇರುವ ತನಕ ನಿನ್ನ ಪ್ರೀತಿಯ ಋಣವ ನಾನೆಂದೂ ತೀರಿಸಲಾರೆ ಸಖಿ 

=> ವೆಂಕಟೇಶ ಚಾಗಿ

Comment on WhatsApp : 9611311195)

ಗಜಲ್ | ಅಲೆಯ ಮೇಲೆ | ವೆಂಕಟೇಶ ಚಾಗಿ

 ಗಜಲ್

ಏನು ಮರೆಯಲಿ ನಿನ್ನ ನೆನಪುಗಳ ಅಲೆಯ ಮೇಲೆ 

ಏನು ನುಡಿಯಲಿ ನನ್ನ ಕನಸುಗಳ ಸುಳಿಯ ಮೇಲೆ 

ಮನದ ಅಂಬರದ ಮೇಲೆ ನಿನ್ನ ನಗುವಿನ ಚಿತ್ತಾರ 

ಏನು ಚಿತ್ರಿಸಲಿ ನಿನ್ನ ನಗುವಿನ ಅಂದದ ಮೇಲೆ 

ಕಾಣದೂರಿನಲ್ಲಿ ಈ ಮನಸು ನಿನಗಾಗಿ ಅಲೆಯುತ್ತಿದೆ 

ಏನು ಹುಡುಕಲಿ ನಿನ್ನ ವಿಳಾಸದ ಪತ್ರದ ಮೇಲೆ 

ನಶ್ವರ ಬದುಕಿನೊಳಗೊಂದು ಸುಂದರ ದೀಪ ನೀನು

ಏನು ಬೆಳಗಲಿ ನಿನ್ನ ಕಣ್ಣೋಟದ ಬೆಳಕಿನ ಮೇಲೆ 

ಅಪರೂಪದ ಖಜಾನೆಯು ಈ 'ಕವಿ'ಗೆ ದೊರೆತಿದೆ 

ಏನು ಗಳಿಸಲಿ ನಿನ್ನ ಸೌಂದರ್ಯದ ನಗೆಯ ಮೇಲೆ 

=> ವೆಂಕಟೇಶ ಚಾಗಿ

Comment on WhatsApp : 9611311195)